Job 33

1 “Khathesi-ke, Jobe, lalela amazwi ami; nanzelela konke engikutshoyo.

2 Sengizawuvula umlomo wami; amazwi ami asesolimini lwami.

3 Amazwi ami aphuma enhliziyweni eqotho; izindebe zami zikhuluma ngokukholwa lokho engikwaziyo.

4 UMoya kaNkulunkulu wangenza; umphefumulo kaSomandla ungipha impilo.

5 Ngiphendula nxa ungangiphendula; zilungiselele ukuthi ungiphikise.

6 Lami nginjengawe phambi kukaNkulunkulu; lami njalo ngathathwa emhlabathini.

7 Ukungesaba kwakho makungakwethusi, njalo isandla sami masingasindi kuwe.

8 “Kodwa ukhulumile ngisizwa – ngiwezwile amazwi wona kanye –

9 ‘Ngimsulwa njalo kangilasono; ngihlanzekile kangilamlandu.

10 Ikanti uNkulunkulu ubone okusolekayo kimi; ungithatha njengesitha sakhe.

11 Uyazikhina izinyawo zami ngezibopho; uyaziqaphelisisa zonke izindlela zami.’

12 “Kodwa ngiyakutshela ukuthi lapha uyalahleka, uNkulunkulu mkhulu kulomuntu.

13 Kungani umsola usithi kaphenduli amazwi omuntu na?

14 Ngempela uNkulunkulu uyakhuluma, – khathesi akhulume ngale indlela, aphinde akhulume ngenye – lokuba umuntu angaze akunanzelela.

15 Kungaba ngephupho, kube ngombono ebusuku lapho abantu belele befile bethe nya emibhedeni yabo,

16 angakhuluma ezindlebeni zabo, abethuse ngezixwayiso,

17 ukuze aguqule umuntu ekwenzeni okubi aqede ukuzikhukhumeza kwakhe,

18 ukulondoloza umphefumulo wakhe ungayi egodini, lempilo yakhe ingabhubhi ngenkemba.

19 Loba umuntu angajeziswa ngobuhlungu esembhedeni wakhe, langokuqaqamba okungathuliyo emathanjeni akhe,

20 aze ezwe umzimba wakhe usunengwa yikudla lomoya wakhe usenyanya lokudla okumnandi kakhulu.

21 Inyama yakhe iyacikizeka iphele, lamathambo akhe ayekade evaliwe abonakale egcekeni.

22 Umoya wakhe uyasondela egodini, lempilo yakhe kuzo izigijimi zokufa.

23 “Kodwa nxa kulengilosi eceleni kwakhe, engummeli, eyodwa phakathi kwenkulungwane, ukutshela umuntu okuyikho okumfaneleyo,

24 ukuba lomusa kuye isithi, ‘Mxolele angayingena egodini; sengimzuzele inhlawulo yakhe yokumhlenga’ –

25 bese inyama yakhe ivuselelwa njengeyomntwana; iyavuselelwa ibe njengezinsukwini zobutsha bakhe.

26 Uyakhuleka kuNkulunkulu amthokozele, abubone ubuso bukaNkulunkulu amemeze ngentokozo; uyabuyiselwa nguNkulunkulu esimeni sakhe sokulunga.

27 Kuthi-ke abesebuya ebantwini athi, ‘Ngenza isono, ngahlanekela okulungileyo, kodwa kangisazuzanga obekungifanele.

28 Wawuhlenga umphefumulo wami ukuze ungayi egodini, ngakho ngizaphila ukuze ngikholise ukukhanya.

29 “UNkulunkulu uyazenza zonke lezi izinto emuntwini – kabili, noma kathathu –

30 ukubuyisa umphefumulo wakhe ungayi egodini, ukuthi isibane sokuphila sikhanye kuye.

31 “Nanzelela, Jobe, ulalele kimi; thula kukhulume mina.

32 Nxa ulolutho lokutsho, ngiphendula; khuluma sibili, ngoba ngifuna ukuthi ugezwe umlandu.

33 Kodwa nxa lungekho lalela kimi; thula zwi mina ngizakufundisa ukuhlakanipha.”